नाना, गांजिती गांजिती नाना ।

पाहती लवविण्या माना, आमुच्या ।।२।।

भस्मासुर जव बल दावी, तव युक्ति प्रभुस शोधावी । लागली ।।

घाबरले शंकर भोळे, पळती त्या रानोमाळे । पाहूनी ॥

मदमत्त हत्तिसम झाला, मरणास्तव बुध्दि त्याला ।   फावली ।।

(अंतरा) विष्णुनी, वेष घेउनी, बनुनी मोहिनी ।

गर्वि असुरांना गर्वि असुरांना

जाळिले त्याचि हातांना, लावुनी ॥३॥

हा आजवरीचा खेळ, मग मिळेल कैचा मेळ । आमुचा ?।।

यासाठी एकचि आहे, सुचतो मज तो सदुपाय । अंतरी ।

दैवि-शक्ति प्रगट करावी, अभ्यासे हृदयी ल्यावी । आपुल्या ॥

(अंतरा) मग राम, पुरवि हे काम, देइ आराम ।

भक्त लोकांना,भक्त लोकांना । 

मानवा मिळे जिवदाना, निश्चये  ।।४।। 

धर्माची इभ्रत जावी, मंदिरे स्मशाने व्हावी। पाहता ।।

अबलासि क्रूर भेटावे, सति-सेव दुजाकरि जावे । पाहता ।।

गाईचे रक्त वघळावे, नेत्रांनी आम्हि बघावे । पाहता ।।

(अंतरा) हे कसे, शोभते असे ? दुःख मरणसे ।

दया हो प्राणा, दया हो प्राणा ।

का दया तुम्हा यावी ना,बंधुनो ! ॥५॥

या उठा उठा सगळेची, आळवा प्रभू-हृदयासी। गर्जुनी ।

तो सखा आमुचा आहे, संकष्टी भक्ता राहे । रक्षुनी ।।

धावुनि ये ब्रिद हे त्याचे,पाहिजे आर्त जीवाचे । सर्वही ।।

(अंतरा) मग चक्र,धरी करि शक्र, चिरोनी नक्र ।

पाडि असुरांना, पाडि असुरांना ।

हा त्या देवाचा बाण, सर्वथा  ।।६।। 

चाहुल द्या लागू कानी, सांगू त्या प्रभूषि कहाणी । आपुली ॥

अपराधाविण मनुजांना, मारणे शास्त्र हे कोणा । सांगते ?॥

आपुले हक्क मिळवावे, न्याये हे कथिले देवे । अजवरी।।

(अंतरा) मग पाश,कसा आम्हास,बनवितो दास ।

प्रभू असतांना, प्रभू असतांना ?

तुकड्याची वार्ता कानी, घ्या जरा ॥७।।