उघडा मंदिर हे, देहाचे
(चालः बाळा ! जो जो रे.)
उघडा मंदिर हे, देहाचे, बघण्या आत तयाचे ॥धृ०॥
जळतो दीप सदा, जिवनाचा, प्रकाश निर्मळ त्याचा ।
नच हा सूर्य-शशी, जगतीचा, अंत न लाभे त्याचा ॥१॥
वाद्ये गोड किती, मधुर गती, नाद अनाहत होती ।
अंबर गर्जतसे, झणझणती, न कळे त्यांची गणती ।।२ ॥
झरणे वाहतसे, चौफेरी, इडापिंगळा - धारी ।
झुळझुळ नाद निघे, झंकारी, सोहं शब्द उच्चारी ॥३॥
बसती देवगण, आनंदे, आपआपुल्या छंदे ।
सिंहासन त्यांचे, निर्द्वंदे, निर्मल दलिदलि नांदे ॥४॥
सुंदर संघ दिसे, वृत्त्यांचा, जोडा जीव-शिवाचा ।
चाले वाद सदा, दोघांचा, इहपर भोग - सुखाचा ॥५॥
आत्मदेव सदा, संतोषी, नित्य सत्य अविनाशी ।
साक्षी सर्वांचा, बहुदेशी, अगम्य निर्गुणवासी ॥६॥
तुकड्यादास म्हणे, भक्तांसी, भेटा प्रभुरायासी ।
पावन देह करा, हृषिकेशी, आहे सर्वापाशी ।।७॥