(चाल: जगदीशा जगत्‌पाला.. )

कुणि सांगा हो, कुणि सांगा हो, कुणि सांगा राम कुठे माझा ।।धृ0।।

कोठे जाउनि पाहिन त्याला? जवळी तो की विवरी गेला?

दीन अभाग्या का अंतरला ? पुरविल जिविच्या या काजा ।।१।।

बनवन फिरता टपले डोळे, दुःखित शरिरे झाले सोहळे ।

नेत्र पिसे खळवळले भोळे, पाहण्या सुंदरशा साजा ।।२।।

जन्मापासुनि दु:खित झालो, गृह-धनदारा यातचि भुललो ।

मी मोठा हे म्हणता झुललो, सांडियली शरिरे लाजा ।।३।।

संतकृपे आठव ती झाली, नेत्रा तळमळ धुंदी भरली ।

आस जगाची सगळी हरली, तुकड्या पद-जल ते पाजा ।।४।।