(चाल: ठेविले पाऊल दारी...)

हिंदभूच्या लेकरा ! मुखचंद्र, का सुकला असा ?।।धृ०।।

शक्ति ना शरिरी दिसे, ना धैर्य झळके  अंतरी ।

अध्थि-पंजर देह हा, अन्नान्नसा दिसतो कसा? ।।१।।

नेत्र दिसती   लालसे, रक्ताळले  चिंता - धुरे ।

तारुणीच्या   मोहपाशे, दाटली   दिसते   निशा  ।।२।।

याद होते का कधी, तुज पूर्वजांची अंतरी ?

बघशि का इतिहास तू? त्या शूर पुरुषांचा ठसा? ।।३।।

धूर॒ कनकाचा निघे, या भारती मृत्तिकेतुनी ।

अन्न ना मिळते  अता, झाला   धनाचा   कोळसा ।।४।।

धर्म कळतो का तुला? अणि देश कळतो का तुला?

पाप तुज  बघवे   कसे  रे !   केशरीच्या   पाडसा ! ।।५।।

रक्त कां थिजले तुझे ? परधर्म चढता पाहुनी ?

(चल)ऊठ जागा हो अता,ही सोड विषयांची तृषा ।।६।।

दास तुकड्या सांगतो, रहावे कसे जाते तुला? 

मरणे बरे भूमीवरी, परि  दास्य  ना  हो   माणसा  ।।७।।