(चाल:तुजबिन मोरी कोन...) 

राष्ट्र जगावा, राष्ट्र जागवा; जागृत व्हा तरुणांनो ! अमुच्या ।

वीर वृत्तिचा दिवा उजळवा,जागृत व्हा तरुणांनो ! अमुच्या 0 ।।धृ0।।

धर्मनीति ही दलित दलापरि, भारतभूची झाली ।

भक्तिमुक्तिचे सोंग वाढले, दुर्बलता करि आली ।अमुच्या0 ।।१।।

तत्वज्ञान हे विसरुनि गेले, रुढिस मान मिळाला ।

जिकडे तिकडे पंथ-मतांतर, गोंधळ हा घरि आला ।अमुच्या0।।२।।

सुळसुळाट हा साधुजनांचा, पोट भराया झाला ।

यथार्थ कोणी सांगि न कोणा,भ्याडपणा उरि आला । अमच्या 0।।३।।

सत्य भक्तिचे विसरुनि पथ हे, पोकळ भाव निघाला ।

देवावरती वाहि फुले परि, पाणि न दे गरिबाला । अमुच्या 0।।४।।

तुकड्यादास म्हणे ही कहाणी, सांगा हो ! जनतेला ।

नाहि तरी मरणेच बरे हे, भुत परका घरि आला । अमुच्या 0।।५।।