(चाल : अब तेरे सिवा कोन..)

चल ऊठ गड्या ! झोप सोड सोड आपुली ।

हे  पेटले    चहुकडोन, आग   लागली ।।धृ0।।

कोणी कुणास मारती   खुशी   म्हणोनिया ।

कोणी कुणास पळविति अबला गणोनिया ।

पोटास अन्न ना म्हणोनी बाळे मारिली। हे पेटले0।।१।।

कोणी कुणाची भक्ति  करी  बंद  येउनी ।

साधु ऋषी तसेचि मरति ना मिळे कणी ।

ही काय चालली भयाण धुंदता खुली । हे  पेटले0।।२।।

हा बाग लाविला कुणी? कुणाची ही मुले ? ।

धरीत चालली फुले  नि   झाड   तोडिले ।

काळोख पसरला नि वीज चमक लागली । हे पेटले0।।३।।

आवाज कुठुनि येत हा  कडाकडा   वरी? ।

हे वरुनी उडत काय? पाहि पाहि सत्वरी ।

तुकड्या म्हणे प्रभूने काय वेळ आणली ! हे पेटले0 ।।४।।