तुझ्या भक्तीनं मन माझं करते तुफान !
(चाल: सारी दुनिया का तूही करणधार है..)
तुझ्या भक्तीनं मन माझं करते तुफान !
वाटे मस्तीन निघतो का हा जीव-प्राण ।।धृ0।।
नाचतो-डोलतो लाज नाही जरा ।
बोलण्याची न उरते जराही धुरा !!
बालकांचे परी डोलते ही कमान ! ।।१।।
वस्त्र अंगात राहो न राहो कधी ।
अन्न खावो न खावो न राहो सुधी !!
पागलावाणी कोठेहि, करि गुण-गान ! ।।२।।
कोणी ऐका न ऐका तरी बोलणे ।
आपुल्या प्रीय देवासवे खेळणे ।।
वृक्ष - वेली - फुले, ऐकती देती कान ! ।।३।।
मीच गातो नि हसतो मला पाहुनी ।
कल्पनेच्या भरी, भिन्न नाही कुणी ।।
दास तुकड्या म्हणे, रंगले सर्व रान ! ।।४।।
- मुंबई रेल्वे -प्रवास, दि. २0-१0-१९५९