(चाल: चोरी करायला कशाला शिकला...)

तुझ्या भजनाचं प्रेम मना लागू दे हो ।

वृत्ति सत्कर्म   करण्यासि, जागु   दे  ।।धृ0।।

नको केवळ भजन, जेथे नाही मनन । 

जरा नाही चिंतन, तल्लिन नाही तन-मन ।।

जे चुकलो ते सुजनासि सांगु  दे  हो ! ।।१।।

मुख नाम स्मरी, मन चोरी करी ।

हात घे खंजेरी, नेत्र विषयांवरी ।।

हे करण्याचे ढंग   सारे   भंगु दे   हो ! ।।२।।

राहो साधे जिवन, सत्य - चारित्र्यपन ।

सेवा करण्याचे गुण, मनि संतोष-धन ।। 

हेचि तुकड्यासि जिवनी या लाभू दे हो ! ।।३।।

                        - गुरुकुंजआश्रम, दि.१७-0५- १९५९