(चाल: .काहेको तीरथ जाता रे भाई...)

कशाला काशी जातो रे बाबा ! कशाला पंढरी जातो ! ।।धृ0।।

संत सांगती ते ऐकत   नाही, इंद्रियाचे    ऐकतो । 

कीर्तनी मान डोलवितो परी,कोंबडी,बकरी खातो !।१।

वडील जनाचे श्राध्द कराया, गंगेमाजी पिंड देतो । 

खोटा व्यापार जरा ना सोडी, देव कसा पावतो? ।।२।।

खांदी पताका,तुळसी गुळ्यामधे, घडी-घडी टाळ वाजवतो । 

गरीब-गुदांची दया ना चित्ती, दानासी हात आवरतो ! ।।३।।

झालेले मागे पाप धुवाया, गंगेत धावुनी न्हातो ।

तुकड्या म्हणे,सत्य-आचरणावाचोनी, कोणीच ना मुक्त होतो ।।४।।

                                - प्रवरानगर दि. १४-0९-१९५९