(चाल: जो आवडतो सर्वाला, तोचि आवडे...)

व्हा सावध सकल सुजनहो ! द्या निज-कर्माची ग्वाही ।।

चहू बाजूनि ज्वाल उफळला, ही वेळ  सुखाची  नाही ।।धृ0।।

कोणी कुणावर प्रेम करीना ।

सत्तेसाठी   मुरगळी  माना ।

स्वार्थास्तव करिताती धिंगाणा ।। होss

देइल ही साक्ष कुणीही ।।१।।

नच मानवता उन्नत दिसते ।

नैतिकता ढासळली गमते ।

शब्दांचे अवडंबर  नुसते ।। होss

हे कुठवर आता राही  ।।२।।

म्हणोनी विनंती प्रिय बंधूंना ।

सहकारी जीवन बनवाना ।

सकळावरती प्रेमे करना ।। होss

तरि देश प्रगत हा होई ।।३।।

या संकटिया ! सहकारी व्हा ।

जातियतेच्या विसरुनि भावा ।

तुकड्यादास म्हणे सांगा हो-।। होss

संदेश   भरा   उत्साही ।।४।।

गुरुकुंज आश्रम, दि. २0-0६-१९५९