(चाल: सुखे नांद सखेबाई... )

आता मला नको तीर्थ, दुसरे कुणी हो ।

पाहिले मी गुरुकुंज    चित्त   लावोनी ।।धृ0।।

गाढवाचे घोडे होती, तुकोबाची ऐसी उक्ति ।

प्रत्यक्षची ही   प्रचिती, घेतली   झणी ।।१।।

बालकासी धडा द्यावा, तेसी शिकविती सेवा ।

सहकारी तत्वे सगळी, पटविती मनी ।।२।।

सर्वधर्म वर्म यात, सर्व संत-आदर त्यात ।

सर्व संप्रदाय असती, एकटया   ध्वनी ।।३।।

सर्व मानवांची सेवा, करा धरुनि जीव-भावा ।

दास तुकड्याने कथिला, मार्ग बोधुनी ।।४।।

                                     - सोनेगांव, दि. १५-९-१९५९