(चाल: धीरैसे आजा रे..)

तुझे ध्यान हे अंति येईल कामी ।

म्हणोनि प्रभु ! शरण आलो तुला मी ।।धृ0।।

महाकाळ   विक्राळ   बाधू   शकेना ।

तुझ्या चिंतने विघ्न टळताती नाना ।

सदा सौख्य आनंद पावेल प्रेमी ।। म्हणोनि0।।१।।

अहिल्या शिळा स्पर्शता मुक्त झाली ।

महाकिर्ती ही व्यापली, कर्णि  आली ।

किती भक्त हे तारिले रामनामी ।। म्हणोनि0।।२।।

अति संकटे  व्यापिती  मोहजाळे ।

सदा जीव कामादि दुःखात लोळे ।

म्हणे दास तुकड्या सदा हो तुझा मी ।।म्हणोनि 0।।३।। 

                                       रामटेक, दि.१९-0१-१९५४