(चाल; विठ्ठल तो आला आला...) 

विठठुल विठ्ठल  बोला, प्रिय भाविकांनो ।।धृ0।।

मुखे घेऊनिया नाम, अंगे करा  नित्य  काम ।

दयाभाव ठेवुनी चित्ती, सर्वाभुती राखा प्रेम ।।

त्याग करोनी विषयांचा, कामक्रोध दुर्व्यसनांचा ।

शरण चला साधूसंता, जिवा तारण्या बंधूंनो ।।१।।

पंथ पक्ष सारे विसरा, सर्व मिळुनि ग्रामा सुधरा ।

हाचि बोध संती केला, ग्रंथ मंथुनीया  सारा ।।

धर्मनीति हेची सांगे सद्गुणासि बोधा अंगे ।

हाक कानि घ्या तुकड्याची, वारकऱ्यांनो ! सुजनांनो ।।२।।

                             - पंढरपूर मार्ग, दि. १0-0७-१९५४