(चाल: अवताराचे कार्य कराया...

विद्वानांनो ! व्यक्तिसुखास्तव, ही विद्वता नाही तुम्हा ।।धृ0।।

असतिल जे जे अनपढ कोणी,शिकवुनि त्या विद्वान करा ।

तरीच फिटे हे ऋण देशाचे, हे का माहित नाहि तुम्हा ?।।१।।

बहुजन जनता या देशाची-जोवरी गावंढळ दिसते ।

तोवरी किंमत नाही कुणाला, निवडूनि पुसतो कोण तुम्हा ? ।।२।।

आपण तरले नव्हे नवल ते ! संतमूनि हे उपदेशी ।

ऐकुनि या वचनासी त्यांच्या, सत्कार्याचा मार्ग क्रमा ।।३।।

घराघरातूनि भारतवासी, नीटनेटका जव दिसला ।

तुकड्यादास म्हणे त्या दिवशी, शिरसावंद्य तुम्हीच अम्हा ।।४।।

                                   - गुरुकुंज, दि. 0६-११-१९५५