(चाल: सुंदर गाव बनाओ अपना...)

वाच वाच रे गीता ! वीरा वाच वाच रे  गीता ।।धृ0।।

भयाभीत मोहाने अर्जुन, जेव्हा हतबल होता ।

ज्ञान-बोध देवुनि श्रीकृष्णे,गांडिव दिधले हाता ।। वीरा0 ।।१।।

तेचि खरे तव साथी, ज्यांची उज्वल कीर्ति दिगंता ।

थोर असे जरी,पण अन्याई, बघ सांगे  प्रभु  आता ।।वीरा0 ।।२।।

पाहू नको नाती अणि जाती, पक्षापक्ष अहंता ।

सत्याचे वाली होउनिया, सुखवी भारतमाता।। बीरा0 ।।३।।

उज्वल धर्मा रक्षण करण्या, अपुला जन्म सुबीता ।

ब्रीद सोडणे महापाप हे, ऐक ऐक गुणवंता ।। बीरा0।।४।।

तीच वेळ अणि तोच काळ हा, आला अपुल्या माथा ।

तुकड्यादास म्हणे निर्भय हो, प्रार्थुनिया भगवंता ।।बीरा0।।५।।