(चाल: मंगलमय नाम तुझे...)

रामनाम सतत मुखी, राहू दे मना ।।धृ0।।

जन्माचे पोषक जे, मृत्यूला सार्थक जे ।

त्रिविध तापनाशक, गुण गाउ दे मना ।।१।।

मानव-जिवनात अती, संकट हे येती किती ।

टाळण्यासी विघ्न-दुःख जाउ दे  मना ।।२।।

सत्‌चर्या साधु संग, कीर्तन भजनात रंग ।

येईल  ते   तीर्थ   संत, पाहू   दे   मना ।।३।।

आश्रम, घर पुनित ज्यांचे, पूजक जे सुजनांचे ।

दर्शन मज नित्य त्यांचे, घेऊ दे मना ।।४।।

तुकड्यासी जनसेवा,घडू देया जिव-भावा ।

नम्र,  अहंकार - रहित,  होऊ  दे  मना ।।५।।