( चाल : बारबार तोहे क्या समझाये...)

शांति कुणाला कशी लाभते ? वाढतसे ज्वाला ।

विचारा जाऊनि शहाण्याला ।।

पेटले हे रान सारे, कोण विझवि याला ?

विचारा जाऊनि  शहाण्याला ।।धृ0।।

दुरुनि बघावे का म्हणता ? कोण तुम्हा सोडील तसे ?

जरि मरती पशु - पक्षि वनी,तुम्ही तरी वाचाल कसे ?

ही कसली रीती - नीति  असे ! !

म्हणुनि सांगतो, सावध व्हाना, सोडुनि ममतेला -

विचारा जाऊनि  शहाण्याला 0।।१।।

कर्तव्याचे काम जिथे, तेथे दुर्बल घात करी ।

उपदेशाचे काम नसे, तेथे वाचा  मौन  बरी ।।

अरे ! चला पुढे मन स्थिर करी ।।

हेच सांगते मित्रा ! गीता तुझ्या अर्जुनाला ।

विचारा जाऊनि शहाण्याला 0।।२।।

आपण आपुल्यासाठी नसू, जगू-मरु समुहासाठी ।

समुहाचे कल्याण तिथे,खरी शांति अपुल्याच दिठी ।।

काळ असा हा उठाउठी ।।

मित्रा ! हे न जयाला कळले, त्याचा जन्म फुका गेला ।

विचारा जाऊनि शहाण्याला 0।।३।।

खरी शांति त्यांना मिळते, ज्यांचे जीवन त्यागि असे ।

सेवा व्रत आजन्म जया रोग   भोग   काहीच   नसे ।।

ऐ ! भारतियांनी बना तसे ।।

तुकड्यादासा हेचि आवडे, सगळ्या संताला ।

विचारा जाऊनि शहाण्याला 0।।४।।