(चाल: आवो सभी पिल जायके...)

कोणी कुणास का म्हणा, अपुलेचि बघावे ।

स्वत:चि   आचरावे,  हे   स्पष्ट   असावे ।।धृ0।।

बोलेल तसे वागे, तो थोर म्हणावा ।

सांगे परी न वागे, हा चोर म्हणावा ।

सर्वांमुखीच मंत्र असे, तंत्र घुसावे ।। स्वतःचि 0।।१।।

माणूस तो, कधी न जया क्षृद्र कल्पना ।

सर्वावरीच   प्रेम   करी, भव्य   भावना ।

हा देश आमुचा म्हणूनि,नम्र दिसावे ।। स्वत:चि 0।।२।।

श्रम शक्तिचा विकास अता हो घरोघरी ।

लाजू नये कुणीही काम   घ्यावया  करी ।

सर्वास हो सुख शांती,हे पाठ म्हणावे ।।स्वत:चि 0।।३।।

सत्‌कर्म करुनी जो फळेचि मागिना कधी ।

तो आदरासी पात्र असे  सांगू   या   जगी । 

तुकड्या म्हणे गणराज्य हे,ऐसेचि दिसावे ।। स्वत:चि 0।।४।।