(चाल -लगाले प्रेम ईश्वर से...)

गजानन ! नाम स्मरतांना, कृपेची धार ओलावे ।

पाहणे हे  जया   वाटे, तयाने   संत  गुण   गावे  ।।धृ0।।

जयाचे तीर्थ घेतांना, मरतसे    जागले    लोकी ।

तयाची कीर्ति ही ऐसी, गजानन-विजय शोधावे ।।१।।

धन्य हा संत शेगावी, प्रगटला   भक्त   ताराया ।

अजब दावूनिया माया, लोक निज भक्तिसी लावे ।।२।।

कुणाला मुक्तिचा प्रेमा, कुणाला   भक्तिचा   नेमा ।

कुणाच्या पूर्ण मनकामा, करितसे जो स्मरे भावे ।।३।।

म्हणे तुकड्या न आम्हांसी, चाड या मोहपाशाची ।

कृपा करिती गजानन ! हे, तरिच निज ज्ञान ते पावे ।।४।।