(चालः पतीतपावन नाम ऐकुनी..)

सद्गुरुची निज कृपा व्हावया, फिरते मन माझे ।

काय करु साधना ? कुणावर घालू मी ओझे ?।।धृ०ll

शास्त्रे बघता शोध मिळेना, भिन्न मते  त्यांची ।

देव भजू की गुरु भजावा ? मनि शंका जाची ।।१॥

काय करावे कर्म   तरी, हे    सांगेना   कोणी ।

अपुले अपुले सर्वच वदती, गुंग  होत   वाणी ॥२॥

सत् संगतिचा लाभ घ्यावया, भटके जिव माझा ।

आड येति षडरिपू, मिरविती विषयाचा वाजा ।।३॥

हृदय बावरे चंचल झाले, स्थीर जरा नाही ।

उपाय सद्गुरुवाचुनि आता न पडे  मज  ठाई ॥४।।

सर्व - साक्षि सद्गुरु ! तुम्हा का लागे   सांगावे ?

तुकड्यादासा भाव जाणुनी उचित प्रेम   द्यावे ॥५॥