(चाल: चल ऊठ भारता आता ...)

त्राहि त्राहि जिव हा देवी ! जगदंबे ! दृष्टी फिरवी IIधृ॥

वय हे गेले   सत्राचे ।

झाले तुकडे धैर्याचे ।

बोल गे ! अजुनि तरी वाचे ।

मस्तक तव चरणी ठेवी । जगदंबे ! दृष्टी फिरवी  l।१।।

फिरविले काम-क्रोधांनी ।

राहिलो अजुन  अज्ञानी I

विषयीच अंग-मन-वाणी ।

पाडशील का भव गोवी ? जगदंबे ! दृष्टी फिरवी ।l२।।

तारिले भक्त भव-पूरी ।

का निष्ठुर गे । अंतरी ?

बालक तुझा दुराचारी ।

पतिताला कासे लावी l जगदंबे !  दृष्टी   फिरवी ।।३॥

मायबाप पदरी न धरी I

मज कोण तुझ्याविण तारी ?

करि गे ! व्याघ्रावर स्वारी ।

तुकड्यादासाला तरवी । जगदंबे ! दृष्टी फिरवी ।l४।।