(चाल : मनाला स्थीर करवाया...)

कशासाठी तिरथधाम ? गुरु दावील तो नेम ।

कुणी या की कुणी जा हो ! नसे चरणाविना काम ॥धृ॥

कुणी करिती पठन गीता, तयासी त्यातची ब्रह्म l

अम्हाला  वाटते   हेची, गुरु   तो   देव   निजधाम ।।१॥

कुणी पंचाग्नि मिरविती, जटा दाढी   बहू   रीती ।

जयाला ज्यात  आनंद,   तयाने   घ्यावे   ते   नाम ।।२॥

कुणी म्हणती विदेही  मी म्हणुनिया नग्नची फिरती ।

करूनिया आस देहाची, फसे का तो   घनश्याम ? ॥३॥

करू मी कोणता नेम ? न होई एकही काही ।

म्हणे तुकड्या धरु चरणा, मिळे त्यातुनि   हे   प्रेम ॥४॥