(चाल: कसा निभवसी काळ..)

श्री सदगुरुचे पाय धरी रे ! तोचि भवी तरतो ।

होउनिया निर्लज्ज भवी रे ! पद गुरुचे  धरितो ॥धृ०॥

मायबाप गणगोत सर्वही, जरि छळिती मजला ।

होउनिया पदि वहाण गुरुची, लीनपणा  धरला ॥१॥

वर्णिति श्रृतिही महिमा त्याची , अपार जगतात ।

रजतमसत्वहि त्रिगुण जाणा ,चरणी लीन होत ।।२।।

ध्यानि मनी जागृती , सदगुरु - चरण जया भासे ।

होउनिया मग कृपा तयाची,  उध्दरती   सरिसे  ॥३॥

अंकित तुकड्या दास गुरुचा , लीन पदी झाला ।

दावि चरण गा ! त्वरित मला तू , प्राणचि घाबरला ॥४ ॥