(चालः गळ्यात माझ्या तूच जिवलगा...)

गुरुदेवाचा अंतरवीणा, अनहदी मी ऐकला ।

ओऽहं सोऽहं नाद घेउनी, मधुर अती वाजला ।।धृ०।।

नाद - बिंदुले प्रगट जाहले, अंतर - नयनावरी ।

गोल गोल हे अग्निचक्रही, प्रसन्न मन ते करी ।।

सहजसमाधी निजस्वरुपाची, घेण्या जीव आर्तला ।

तूचि    साक्षी    दिव्यदर्शनी,   हाच   वेणु   ऐकला ।।१।।

गगन भेदूनी प्रकाश पडला, कोटि सूर्य प्रगटले ।

पहता नयनी नयन विसरले, सूर्यरुप जाहले ।।

तुकड्यादासा गुरु- शिष्य हा, भेदभाव विसरला ।

तू -मी एकचि सर्व व्यापला, अनुभव-गड गवसला ।।२।।