( चाल : वाढो सदा यशाला हा हिंद देश . . )
राजास जी महाली सौख्ये कुणा मिळाली ।
ती सर्व प्राप्त झाली , या झोपडीत माझ्या ॥धृ॥
महाली मऊ बिछाने , कंदील शामदाने ।
आम्हा जमीन माने , या झोपडीत माझ्या ॥१॥
भुमीवरी पडावे , ताऱ्यांकडे पहावे ।
प्रभुनाम नित्य गावे , या झोपडीत माझ्या ।।२।।
स्वामीत्व तेथ त्याचे , तैसेचि येथ माझे ।
माझा हुकूम गाजे , या झोपडीत माझ्या ।।३।।
महालापुढे शिपायी , शस्त्री सुसज्ज राही ।
दरकार तीहि नाही , या झोपडीत माझ्या ।।४।।
जाता तया महाला , मत जाव शब्द आला ।
भीती न यावयाला , या झोपडीत माझ्या ।।५।।
महालात चोर गेले , चोरूनि द्रव्य नेले ।
ऐसे कधी न झाले , या झोपडीत माझ्या ॥६॥
पहारे आणि तिजोऱ्या , त्यातुनि होति चोऱ्या ।
दारास नाहि दोऱ्या , या झोपडीत माझ्या ॥७॥
महाली सुखे कुणा ही ? चिंता सदैव राही ।
झोपेत रात्र जाई , या झोपडीत माझ्या ॥८॥
येता तरी सुखे या , जाता तरी सुखे जा ।
कोणावरी न बोझा , या झोपडीत माझ्या ॥९॥
चित्तात अन्य रामा , शब्दी उदंड प्रेमा ।
येती कधी न कामा , या झोपडीत माझ्या ॥१०॥
पाहोनि सौख्य माझे , देवेंद्र तोहि लाजे ।
शांती सदा विराजे , या झोपडीत माझ्या ॥११॥
वाडे , महाल , राणे , केले अनंत ज्याने ।
तो राहतो सुखाने , या झोपडीत माझ्या ।।१२।।
तुकड्या मती स्फुरावी , पायी तुझ्या रमावी ।
मूर्ती तुझी रहावी , या झोपडीत माझ्या ॥१३।।