(चाल: ऐकता स्वस्थ तरि काय..)

आनंद मला वाटे हो ! पाहुनिया तुमचे पाय ।।धृ0।।

दुमदुमले नगरचि सारे, की स्वर्ग उतरला काय ।

वाटते मनाला ऐसे, तू उध्दरिसी गे माय !

वर्णु काय कीर्ती आता ?

नेति  वेद बोले त्राता !

का इथे चले मम सत्ता ?

मम भाग्यचि उदया आले, पाहिले श्रीगुरुराय ।।१॥

धन्य-धन्य सद्गुरुराया ! सोडवी त्वरित रे माया ॥

बहु बुडलो या व्यवसाया | धरु किती धीर रघुराया !

कनवाळू माझे   आई !

श्री सदगुरू जगदंबाई !

तू भक्त वत्सले    माई !

देह ही तुच्छ हा वाटे, तुज पाहुनि घेत बलाय ॥२॥

तन-मन-धन तल्लिन झाले,जगताला विसरुनि गेले ।

पाहूनि गाय सुखदायी, तान्हुल्यापरी हुंबरले ।।

तुकड्यास ठाव गे ! देई ।

श्रीसदगुरु कृष्णाबाई !

तुजविना दुजे मज नाही ।

भवसिंधु तराया सोपा, तुज ऐसा नाहि उपाय ।।३।।