(चाल: भाललोचना रे गड्या भेटि..)

काय वर्णु गुण तव ते ? श्री कृपाकरा !

ब्रम्हादिक     शरण,     होत   घाबरा ।।धृ०।।

अजब दाविली कि लीला रचुनिया किती ।

धर्म - नीति - न्याय  तुझा,   देत   आसरा ।।१।।

स्तंभाविण नभ-तारे, अधर रविशशी ।

पृथ्वि भोवती  जल  ते,   उचलिली   धरा ।।२।l

वाहतो कि वायु किती पाहिजे तसा ।

जलबूंदहि झुळझुळती, मिळति   सागरा ।।३।।

शोभिवंत हे पहाड , वन कसे फुले ?

पाहुनिया सुख  होई,    मजसि    ईश्वरा ! I|४।।

भरूनिया चराचरी, उरे कसा कुठे ?

दास तो तुकड्या म्हणे,दे भेटि प्रभु ! जरा ।।५।।