(चालः राजास जी महाली..)

दावी स्वरूप आता, का वेळ रामराया !

अनिवार सर्व ओढी ही  काम - क्रोध - माया ।।धृ०।।

तारोनि ध्रुवबाळा, तोडोनि मायाजाळा ।

बसवी स्थळास अढळा, का केलि सांग छाया ? ॥१॥

प्रल्हाद बाळ साचा, सुत होय कश्यपूचा।

का करिसि मान त्याचा ? तो   दैत्य   मारवाया ।।२।।

भक्तात श्रेष्ठ झाला वाणी तुका निवाला।

वाल्मिक तारियेला,    गुण - कीर्ति    वाढवाया ॥३॥

अगणीत भक्त तूझे, हरि ! धाव, येई काजे I               

उचली प्रपंच - ओझे , तुकड्यास  ठाव   द्याया ॥४॥