सेवी हरि - चरणाचा प्याला ।
(चालः निर्भयपद आनंद निरंतर..)
सेवी हरि - चरणाचा प्याला ।
ज्या चरणाने प्रल्हाद तरला ।।धृ०।।
मानुज-जन्म नये कधि पुन्हा ।
माग गुरुसि अजरामर पान्हा ।
नातरि व्यर्थचि गेला ॥१॥
संतसमागम करी त्वरित रे !
फिटेल लौकर तुझी भ्रांत रे !
प्रपंचि का रे ! भुलला ? ।।२||
क्षण भंगुर ही नरतनु प्राण्या !
उपाय करि रे ! आजचि शहाण्या !
रत हो गुरु - चरणाला ॥३।।
रामनाम नित सेविसि जरि तू ।
तरशिल सत्यचि भवसागरि तू ।
अहंपणेच बुडाला ।।४॥
यम मारील घरावरि डाका ।
मारशील कोणा मग हाका ?
तुकड्या म्हणे जप माला ।।५॥