(चालः बिकट वाट वहिवाट नसावी..)

श्रीहरि - चरणी लीन राहुनी स्वहीत अपुले हरु नको ।

आधि विवेके प्रपंच करुनी भक्तिभाव तो विसरु नको

॥धृ०।।

सर्व जगामधि ब्रह्म एकची उणे कुणाला पाहु नको ।

आनंदे संसार करी पण परमार्थाविण राहू नको ॥

खोटे नाटे वेव्हार करुनी अपकीर्तीला मिळवु नको ।

काम - क्रोध - मदमत्सर मोहो यांचे नादी लागु  नको ॥१॥

साधुसंत-ऋषिमहंत यांचे चरण कधीही सोडू नको ।

देउनिया विश्वास कुणाला मग मागे बा ! फिरु नको ॥

परधन आणिक परकांतेवरि लक्ष कधीही ठेवु नको I

आले संकट किती जिवावर धैर्य कधीही  सोडु  नको ॥२॥

पुण्यकर्म करुनिया अंतरी पश्चातापा आणु नको ।

सर्व जगामधि मीच शहाणा शब्द असे हे जाणु नको ॥

तुकड्या बोले शरण आलिया मरण कदापी देऊ नको ।

सदगुरु चरणी शरण राहुनी स्वरुपाचा भ्रम ठेवु नको ॥३॥