सख्या वनमाळी ! पहा तरी काही ! !
( चाल : आज दिवाळी . . )
सख्या वनमाळी ! पहा तरी काही ! !
कटावरी कर ऐसा धरुनी का राही ? llधृ।।
किती युगे गेली मागे , संत सांगताती ।
झाला नाही का विचार आपुलिया चित्ती ?
अशांतले जग काही नुरलीसे आशा ।
चहू बाजुनिया सगळा जाहला तमाशा !
बोलरे ! बोलना ! ! तुज भान नसे काही ॥१॥
चोरी जारी दिवसा ढवळ्या करीती जे जन ।
तरी त्यांचा लोकामाजी वाढतसे मान ।
हरीनाम गाती नित्य त्यांना नाही अन्न ।
सत्याने वागती त्यांचा नाही मान - पान ।
कोणरे , कोणरे त्याची देई ग्वाही ! ! ॥२॥
तुझ्यासाठी करिती त्याग , वाली तू म्हणोनी ।
रात्रंदिन तुझिया चरणी प्राण सांडवोनी ।
कोणा नको त्रास म्हणोनि नम्रता धरोनी ।
तुकड्यादास म्हणे त्यांची ऐकिना कहाणी !
तोलरे , तोलना ब्रिदासाठी येई ! ॥३॥
- लोणावळे , दि . २२ - ०७ - १९५९