( चालः सरपे टोपी लाल , हाथ में . . . ) 

वाहवारे गणराज ! शोभली भक्ति - पुजाही आज , 

भला उल्हास दिसे । ।

बालमनाचे ध्यान , करितसे तुजसाठी तूफान , 

भला उल्हास दिसे ॥ धृ० ॥ 

मोदकाचे गंज ताटी , पुष्प चंदनाची दाटी , 

लाल गुलालाच्या वाटी । 

रत्नजडित हार कंठी , कुंडलाची प्रभा मोठी , 

पितांबर रेशम - काठी । 

नव - तरूणाचे प्राण , सदा तव भवति करी गुणगान , 

भला उल्हास दिसे ॥ १ ॥ 

लखलखाट भोवताली , धूप दिपांच्या मशाली , 

जणू दिवाळीच आली । 

आम्र - तोरणाच्या वेली , महाद्वारे फुलली - सजली , 

अपूर्व ही शोभा आली । 

वाद्ये वाजती छान , चालती नृत्य आणि गुणगान , 

भला उल्हास  दिसे ॥ २ ॥

तोल सावरेना कोणी , कुणी कुणाचे ना मानी , 

वेडावले भावनानी । । 

मुला - मुलींची मनमानी , रासलीला दिसते नयनी , 

कुणी ऐकिना गाऱ्हाणी । 

पाहतो तुकड्यादास किती हा धन - द्रव्याचा नाश , 

भला उल्हास दिसे ॥ ३ ॥ 

              - प्रवास ब्रह्मपुरी ते नागपूर , दि . १६ - ०५ - १९५८