जागृत व्हाना देविदेवता ! करा काही कल्याण अता
(चाल : असार जीवित केवळ माया..)
जागृत व्हाना देविदेवता ! करा काही कल्याण अता ।
माणुसकी ही गेली जगाची आणिक गेली बुध्दीमता ॥घृ0॥
धर्मकर्म कवणास म्हणावे समज उमज कोणा नुरला ।
पाप करोनी मजा करा हा अंध-भाव तरुणा स्फुरला ॥१॥
पोटासाठी गुलाम सगळे जे सांगा ते करु म्हणती ।
विरळे कोणी मायभूमिची पर्वा सारे धरू म्हणती ॥२॥
पर-उपकार कशाला म्हणति कठिण मार्ग झाला आता ।
शेजारी जरि अन्नावाचुनि मेला तरि कवणा चिंता ? ॥३॥
हाल असा कुठवरी जगाचा पाहशिल सखया भगवंता ।
गेले ते जाउ दे दिवस पण पुढे नको आणुस आता ॥४॥
सर्व जिवांना दे सद्बुध्दी माणुसकीची कर्म कथा ।
तुकड्यादास म्हणे सर्वाना जाऊ दे कर्तव्य - पथा ॥५॥