(चाल : अब तेरेसिवा कौन..)

आहे तसाच येशील का धाव घेउनी ।

करशील कार्य एवढे न मोह ठेवुनी ? ॥धृ०॥

मधुबंसि टाकुनी कुठे तू चक्र घे करी ।

अणि देवपणा सोडूनी तू करिशि चाकरी ।

ही ऐकशिल हाक    काय   लक्ष   देऊनी ? करशील0 ॥१॥

म्हणतात लोक हे तुला तू कोठला हरी ? ।

असतास तरी दैन्यदुःख घोर का करी ? ।

सगळेच सुखी देश नि गुलाम का आम्ही ? करशील 0 ॥२॥

वद कठीण काय हे तुला तू तेचि ना करी ।

जगी आजवरी हेचि तुझे कार्य श्रीहरी ? ।

मग घे मुकुट घाल चाल मस्त  हो   मनी । करशील 0 ॥३॥

म्हणशील भक्त नाही कुणि हाक मारतो ।

कोणी न पुजा सारती न करती आरती ।

हे विसर अता भक्ती तुझी कोठली जनी ? करशील0 ॥४॥

नच भक्तिचा तू मोह धरी आपुल्या मना ।

वेळेची - अवेळेची सोड सोड कल्पना ।

तुकड्या म्हणे तसाच धाव  धाव  चींतन । करशील0 ॥५॥