(चाल : वनवासी राम माझा..)

येशिल का मोहना रे  ! पाहण्या आपुली लिला ? ॥धृ0॥

सृष्टि कशी सुंदर केली रंगि रंगवुनिया भरली ।

वृत्ति तुला कैसी स्फुरली ? खेळ खेळला ॥१॥

भिन्न भिन्न जिव हे केले गुण-कर्म यांनी भरले ।

आपुले - दुजे ना   उरले    तुचि   जाहला ॥२॥

करिल जसा भोगिल तैसा न्याय नियतीचा तव ऐसा ।

नेम तोचि दासी - दासा  अजुन   चालला ॥३॥

सर्व तुझे केले दिसते तूचि भासशी ना येथे I

हेच उलट कैसे नाते ?   सांग   ना   मला ॥४॥

रंगी रंग ये दासाच्या पुरवि भावना विरहाच्या ।

उभा हो अता तुकड्याच्या नेत्रि निर्मला ! ॥५॥