(चाल : ईश्वरको जान बन्दे... )

हे ईश्वरा ! जिवाला स्वातंत्र्यता असु दे ॥धृo॥

आचारशील जे जे जगि राहतात कोणी ।

त्यांच्या सदा स्वभावा स्वातंत्र्यता असू दे ॥१॥

छळती न जीव कोणी जाणोनि ऐक्यभावा ।

त्यांच्या सदा स्वभावा स्वातंत्र्यता असू दे ॥२॥

सर्वाभूति प्रभु हा नांदत असे सदाची I

मग बंध का कुणाला ? स्वातंत्र्यता असू दे ॥३॥

खावोत आपुलाले श्रमवोनि देह न्यायी ।

त्यांना नसो मनाई  स्वातंत्र्यता    असू   दे ॥४॥

तुकड्या म्हणे निसर्गासम शांत ठेव जनता ।

बहु त्रासलेत आता  स्वातंत्र्यता   असू   दे ॥५॥