( चाल : कमरेला कमरपट्टा ... )

सुख पाहोनि दुसऱ्याचे झुरता का न दुःखात सामील होता ? ॥ धृ0॥

आम्ही फुकट मजुरांचे खावे तरी त्यासि साहाय्य न व्हावे I

यासाठीच पाहिजे का सत्ता ? ॥ का न 0 ॥१॥

कोणी दारी आला उपवासी झिडकारोनि द्यावे का त्यासी ?

सांगा काय सांगे धर्म गीता ? ॥ का न 0 ॥२॥

मुले-बाळे तुमची शिकलेली शेजाऱ्यासी सही नाही आली ।

हा दोष कुणाच्या हो माथा ? ॥ का न 0 ॥३॥

आम्ही म्हणतो सारे भाऊ भाऊ मग सर्व वाटून का न घेऊ ?

हे समजायला पाहिजेच आता ॥ का न 0 ॥४॥

घेऊ नका गडे हो ! शंका हा वाज़ला जगामध्ये डंका ।

ऐका  खुले    बोल    हे   आता ॥ का न 0 ॥५॥

ते विसरा झाले जे मागे नांदू सर्व सुखाने संगे ।

दास तुकड्या म्हणे घ्या ही संथा ॥ का न 0॥६॥

- नागपूर, दि. २७-०३-१९५७