(चाल : गडे हो ! कृष्णा गडी अपुला...)

करा रे ! कृष्ण गडी अपुला ।

मिटे न मैत्री जन्म-जन्मि ही,देह जरी गळला ।।धृ०।।

फुकाचे नाम जपा त्याचे ।

धन-संपत्तिस वाण न राहे, लक्ष्मि   घरी   नाचे ॥१।।

लावता चित्त तया पायी ।

अखंड अमृत-झरा जिवाला  पावे    लवलाही ॥२॥

धरीता ध्यान सगुण त्याचे ।

विश्व ब्रह्म हे,कृष्णचि जिकडे तिकडे जगि भासे ॥३॥

देह अर्पिता तया चरणी ।

वैकुंठाचे राज्य मिळे, करिती   जन   मनधरणी ।।४॥

जरासे देता अति भेटे ।

तुकड्यादास म्हणे कानी घ्या, लक्षि   धरा   नेटे ।|५॥