( चाल : बाळा ! जो जो रे ... )

चुकती काय कुणा भोग असे ? का होता वेडेसे ? ॥धृ0॥

सांगा महाराजा हरिश्चंद्र धर्मात्मा योगींद्र ।

पाणी वाहतसे डोंबाचे नोकर    होऊनि   त्याचे ॥१॥

पांडव भक्त बळी शूर गडी दैवे धरली नरडी ।

फिरती वनिरानी चौफेरी असुनी  साह्य   मुरारी ॥२॥

संत - महंतासी योग्यासी राजे - महाराजासी I

जन्मा आल्यासी गति ऐसी लिहिली दैवी जैसी ॥३॥

तुकड्यादास म्हणे भोगावे सुख - दुख जे जे पावे I

कोणा सांगावे ? का द्यावे ? आपणची सोसावे ॥४॥