(चाल : अरे हरि ! प्यालो...)

चला पंढरी, पंढरी पहायासी ! विटेवर उभा हृषिकेशी ॥धृ०॥

कटेवरि कर, कर ठेवूनिया, वाट पाहतो म्हणतो या या ।

दया ये तया, सर्व जिवाची या, कष्टतो  भक्तांच्या   कार्या ॥१॥

दासि जनीच्या, गोवरिया वेची, शेति राखतो सावताची ।

रसिद नेउनी, बेदरि दामाजीची, मडकी घडवित गोराची ॥२॥

सोडि वैकुंठ, वैकुंठ मूळपीठ, धरिली मृत्युलोकि वाट ।

भीवरे तिरी, वसवुनीया पेठ, उघडले    दुकान   चौहाट ।।३।।

खरेदी केली, पुंडलीके सारी, घेतला विकतचि गिरिधारी ।

भक्तिभावाने, काय त्याचि थोरी, आपण तरुनि दुजा तारी ॥४॥

अती आनंद, आनंद वर्णवेना, भक्त नाचति मिळुनि नाना ।

टाळ-तंबुरे, मृदंग-ध्वनि ताना, मारती   रंगुनिया   ध्याना ॥५॥

दास तुकड्याची, मति कुंठित झाली, पाहता विठ्ठल वनमाळी ।

बघा एकदा, येउनिया जन्मा, करा सार्थक रे ! गा नामा ॥६॥