( चाल : हे भजन तुझे . . . ) 

तुज पाहु कसा ! जीव घाबरला । 

दे दिव्य दृष्टि  बघण्यास  मला ॥ धृ० ॥ 

नयन दिपुनिया अपुरे पडती । 

तेज अतुल तव न सहे चित्ती । 

विशालता तव अथांग दीप्ति । 

डगमगे हृदयिचा धिर   खचला । । दे दिव्य ।। १ ।। 

कुठे नाथ तू , दीन सेवक मी । 

कुठे पूर्ण तू , पथि भाविक मी । 

तू सागर जल - अंश एक मी ! 

कृतकृत्य बनिन , दे वरद् मला । । दे दिव्य० ।। २ ।। 

सहस्त्र - आयुध सहस्त्र कर हे ! 

सहस्त्र - मणिगण सहस्त्र शिर हे ! 

तुकड्यादास म्हणे हरिहर हे ! 

मज भेट - भेट  मजपरी   खुला । । दे दिव्य० ll ३ ll

                 - श्रीक्षेत्र पंढरपुर , दि . २६ - १२ - १९५१