(चाल : शिंग फुकले रणी...)

उठा चला मिळोनिया करु स्वधर्म - प्रार्थना ।

जागवोनिया मना निरोप देउ बंधुना ॥धृ0॥

धर्मज्ञान आपुले कितीक नष्ट जाहले ।

भक्तिमार्ग मोडले नि मंदिराहि तोडले ॥

कोवळेपणीच ज्ञान धर्म - द्रोहि भेटले ।

वृक्ष वाढताचि बुध्दिवंत लोक भ्रष्टले ॥

जीर्ण जाहली रुढी म्हणोनि गेलि वंदना ।

आई - बाप देव - संत यासि कोणि मानिना ॥१॥

जुनेचि वस्त्र घालु खादी आपुली विणुनिया ।

स्वच्छता पवित्रता किती तरी सु - वस्त्री या ॥

तसेच अन्न खाऊ आपुले घरी दळोनिया ।

तेल शुध्द घेऊ आपुले घरी पिळोनिया ॥

कातुनी स्वतंत्र सुत काढु तेल घाणिनी ।

आपुल्या घरीच दळू मोलिबाई लावुनी ॥

तरीच सौख्य पावते आरोग्य येइ जीवना ।

कष्टि करु देह    अणि    सेवु     रामभूषणा ॥२॥

पारतंत्र्य - वृत्ति यंत्र घेउनीच बाणली ।

आळसी जनी वृथा मिजास थोर वाढली ॥

करा घरीच यंत्र मोलि नाणता कुठोनिया ।

कामि लावुनी गरीब अन्न द्या तयासि या ॥

कितीक लोक नोकरीविनाच प्राण ठेविना ।

उद्यमास  लावुनी    जगात    जागवू    जना ॥३॥

सर्व लेकरे प्रभूस एक - पक्षि राहती ।

अम्हीच का न सर्व प्रेमि ठेवितो तशी मती ? ॥

धर्म - द्रोह जाति - द्रोह  देश - द्रोह सोडूनी ।

मिळुनि गाउ राम - नाम प्रेम रंगि रंगुनी ॥

सत्येता मनी धरोनि कृष्ण गीत भूषणा I

सेवकत्व    पावुनी    लढू   तसे    रणांगणा ॥४॥

धर्म - वर्म आमुचे न खोवु देऊ कोणत्या ।

आश्रमी मठी तटीचि ज्योति ठेवु जागत्या ॥

तत्त्व - ज्ञाने शोधुनीच मार्ग जाणुनी वळू ।

पूर्वजापरीच मार्ग आपुलाहि आकळू ॥

सर्व संघटोनि एक होउनि प्रभू म्हणा ।

उणा न ठेवुची कुणा असेल ज्यास भावना ॥५॥

या पवित्र होउनी पवित्र कार्य जाणुनी ।

पवित्रताचि मानवे प्रभूसि या जनी वनी ॥

देह - द्रोह मार्ग - वर्ग सान - थोर हो कुणी ।

पवित्रतेची एक जात राहु सर्व होउनी ॥

कर्म आपुले करोनि या स्मरू प्रभू गुणा ।

दास तुकड्याची हाक घ्या जरा तरी मना ॥६॥