( चाल : सुनते थे नाम हम . . ) 

चित्त तुझे पायी , ध्यान दुजे नाही । 

नाम गावोनि हा जिवभाव रंगला ॥ धृ० ॥ 

ब्रह्म मुहर्तासि करोनि स्नान , 

आलो तुझ्या पायी धराया ध्यान । 

या प्रेमाचा मोह मना लागला,

बघता निरांजनी,तल्लीन झालो मनी । नाम गावोनी० ॥ १ ॥

दरवळला हा सुगंध स्थानी ,

वेडावले मन पुष्प बघोनी । 

मंजुळ नाद कानी ऐकला , 

पडली डोळ्या ताटी, आली दिव्य दृष्टि । नाम गावोनी ।। २ ।। 

बोध जिवाला सततचि होतो , 

अनुभव हा सर्वासचि येतो । 

सत्संगी लाभ जिवा लाभला , 

दास तुकड्या म्हणे , नाही नाही   उणे । नाम गावोनी ।। ३ ।। 

     - गुरुकुंज , दि . १५ - ११ - १९५४