(चालः कृणि कृष्ण पाहिला का माझा..)

चला उठारे तरूणांनो ! हा आळस घेउनि बसला का ?।।धृ0।।

दिवस लोपला सत्कर्माचा रात्र पसरली स्वार्थाची ।

नाही का चिंता याची ? हा भार न भूवरि दिसला का ? ।।१॥

जगणे मरणे राष्ट्राकरिता, धर्म असा हा तरूणांचा ।

ना उरला काळचि याचा, हे समजुनि हृदयी रुसला का ? l।२।l

एकाला धनधान्य मिळे अणि एकाचा जिव-प्राण गरळे ।

नेत्राने पाहता सगळे, या अन्यायामधि फसला का ? l।३।l

देवाने जे रक्त दिले, जे धैर्य दिले अणि ज्ञान दिले ।

ते सगळे विषयासाठिच का ? हा प्रश्न कुणातरी पुसला का ? ।।४।

अवलांचे किति हाल असे अणि गुंडांची बेचाल असे ।

हे प्रगट होय तरि का न दिसे ? भित्र्या जिवनातरि घुसला का ? l।५।।

तुकड्यादास म्हणे घ्या हाती, अपुलाले कर्तव्य अता ।

प्रभु इच्छितसे परिवर्तनची, हा मार्ग न अजुनी दिसला का ? ॥६॥