तू आत्मनिरीक्षण करुनि पाही आपणा ।

मी सत्य, देशप्रीय की अन्य पाहणा ।

मी व्यक्ति-सुखी की,मानवतेच्या खुणा ।

उणीव दिसता आत्मचिंतने, हृदय सरळ होउ दे ।

जन-मना ! पाय पुढे जाउ दे ।।१॥

तुझे न धन ते, तुझे न मन ते, तुझे पुत्र ना तुझे ।

सर्व तू देशव्याप्त - हे तुझे ।

कणाकणातुनि उदारतेची वाणी ही गर्जु दे ।

देश सर्वांगिण सुखी होउ दे ।

तयार नसशिल असे म्हणाया, या अज्ञाना दुरी।

कराया संकल्पचि हा करी ।

ही कळकळ मनि येउ दे, प्रभू आस ही ।

मी जसा तसे मम देशबंधु सर्वही ।

स्वातंत्र्य-दिनी या करा प्रार्थनाच ही ।

पक्ष-पंथ अणि द्वेष - भाव हा, समोर नच येउ दे ।

जन-मना ! पाय पुढे जाउ दे ।।२॥

शीक कराया काम, करांना उद्योगी बनवुनी ।

मित्र-सन्मित्र साथि घेउनी ।

ग्रामिण जीवन उन्नत व्हाया, शक्ति पुरी लावूनी ।

भाग्य उदयास येउ दे झणी ।

कधी कुणाला दुःख न होवो, अपुल्या निज हातुनी ।

करी असे चिंतन हृदयातुनी ।

हा दृढ निश्चय व्हावया प्रतिज्ञा करी ।

तरि स्वातंत्र्याची तुझी दिवाळी खरी ।

अन्याय न होवों अंता असा या पुढे तरी ।

तुकड्यादास म्हणे यासाठिच, मरू अणि जन्मु दे ।

जन-मना ! पाय पुढे जाऊ दे ।।३॥