( चाल : विठ्ठल तो आला . . )

चलाना चलाना बाई ! देव - दर्शनाला । 

देव - दर्शनाला बाई ! देव - दर्शनाला ।। धृ० ।। 

गोड गोड गाणी गाऊ , सावळा मुरारी पाहू । 

जरा तरी थांबू तेथे , नेत्र निववुनीया घेऊ ।। 

आपुलालि हृदये खोलू , नाचु हरि संगे डोलू । 

रंगी नाचु श्रीरंगाच्या , वेळ हा   सुमंगल   आला ॥ १ ॥ 

कधी गायि चारित होता , कधी लोणि चोरित होता । 

कधी राधिकेच्या संगे , प्रेमयोग भोगित होता ।।

कधी अर्जुनाला गीता , कर्मयोग बोधित होता । 

आज निराळेची करितो , संदेश हा ऐकू   आला ॥ २ ॥ 

म्हणे पंथ जाती - पाती , एकची करा ह्या सगळ्या । 

भूमिधना वाटूनि टाका , सोडुनिया भेदा काळ्या ।। 

सर्व कामधंदा करुनी , सुखवाया भोळ्या भाळ्या । 

तुकड्या म्हणे ऐकु त्यांचे , मानवता रक्षण्याला ॥ ३ ॥ 

- गुरुकुंज , दि . २६ - ०६ - १९५४