(चालः यहाँ वहाँ क्या कहाँभि...)

कुठवरी आता गाऊ भजन हे ।

का आवरि ना अजुनी मन हे ? ॥धृ0॥

कळते पण वळते नच काही ।

धावचि घेते विषय - प्रवाही ।

सांगा गुरुराया ! या साठी - काय करावे किती साधन हे ! ॥१॥

भलेपणाने पापहि करते I

पापी म्हणण्या मागे फिरते I

खाया - प्याया पुढे - पुढे पण - सेवेसाठी करी हन् - हन् हे ! ॥२॥

हे द्या ते द्या सर्वची मागे I

मोह अनावर फिरूनी सांगे I

तुकड्यादासा मृत्यु बरा परि - सहन न होई मज प्रभुविण हे  ॥३॥

                           - जानेवारी १९६४