( जाति : छंद ) 

उमगले , उमगले , उमगले जगाचे कोडे ।। धृ० ।। 

जग हे मानवतेने भरले । 

मायामोह धरोनि पसरले । 

जे जे या तत्त्वासि विसरले । 

ते भ्रमले , ते श्रमले , भोगती    सदा   यमकुंडे ॥ १ ॥

जनता देव जयांना कळली । 

त्यांची मानवताही फळली । 

अपुली - परकी भाषा हरली । 

पावले,   पावले,    पावले     सुखाचे       हंडे ॥ २ ॥ 

येथे कोणि न परका आला । 

ज्याचा तोचि अनेकी झाला । 

तुकड्यादास म्हणे हा काला । 

समजले , समजले , समजले ज्ञान ज्या जोडे ।। ३ ॥ 

- श्रीगुरुदेव मासिक डिसेंबर ; १९४७