( चाल : उठा गडया अरूणोदय झाला ... )

वीर सेवका ! ऊठ ऊठना क्रांति - तुतारी ऐक जरा I

समतेसाठी युद्ध शांतिने सुरू झाले रे घरा घरा ॥धृ0॥

जनास समजुनि द्यावयास - एक फकीर पायी पायी फिरे I

भूमिदान धनदान करा ! हा मंजुळध्वनि कानात भरे ॥१॥

अलोट गर्दी तया बघाया मार्ग मिळेना चलण्याला ।

चहुंबाजूंनी रान पेटले भूमि द्या ! म्हणती त्याला ॥२॥

कसेल त्याची भूमि खरी ही हक्काने त्याने घ्यावी ।

उपज करावी राष्ट्रासाठी ज्वारी - बाजरी पिकवावी ॥३॥

तुकड्यादास म्हणे या कार्या सर्व मिळोनी सफल करा ।

वेळ न गमवा चला धावुनी भूमिदानाची धरा धुरा ॥४॥

- मुंबई दि. २८-०७-१९५३