( चाल : चोरी करायला कशाला ? ... )

जमिनदारांनो ! हाक जरा ऐका जामिनदारांनो ! ॥ धृ0॥

झाले सुरू भूमिदान कानी ऐका निदान ।

सोडा स्वार्थाचे भान ।

मनि ठेवू नका काहि शंका ॥१॥

सारे रडती मजूर कष्ट करुनी भरपूर ।

नाही देहास नूर !

याने होईल देशाची लंका ! ॥२॥

जे जमीन कसतात राबतात शेतात

त्यांच्या जमीन हातात-

देऊन टाळा हा होणारा धोका ॥३॥

देऊन जमिनीचे दान वाचवा देशाचा प्राण ।

थांबवा पुढचे तूफान ।

करा समान रावा नि रंका ॥४॥

ऐका तुकड्याची हाक ठेवा देवाचा धाक ।

सांगा सर्व लोकात ।

वाजला सर्वत्र क्रांतीचा डंका ॥५॥

- पंढरपुर दि. २१-०७-१९५३